طارق عليان يكتب: اسـتراحة محارب
ساعات بخاف على مصر
وساعات مابخـفش
أقول طنـش
كبر دماغـك
بيع القـضية وعيش حياتك
من غير هموم
ولا سياسة ولا مناهدة
إعمل غبى وخليك حمار
وبلاش تعاند
وشوف الموجة رايحة لفين
خلى الوطن سبوبة
لقمة طرية
خليك مع العايمة
إشبط ف كل المراكب
إكتب أناشيدك على شراعها
طبل وغـنى
ساعة الغرق نط وسبها
إشبط ف مركب غـيرها
إكتب أناشيدك على شراعها
طبل وغنى
ساعات بخاف على مصر
وساعات مابخـفش
أقول نـفـض
مادام هى عاجبها المر
وتـتمكـيج وتدلع لجلادها
وتغـمزله على عينها
وبتواعده ف سواد الليل
أقول نـفـض
إسمح لعـقلك ينسحب بهدوء
من غيرمكـابرة
الفارس المهزوم جبان
والفارس الهربان جبان
راح تـفرق أيه
إرفع راياتك وإنسحب بهدوء
الإنسحاب أصبح فريضة
الانسحاب يصبح قرار
لما القلوب تـتعـب
لما اللسان يعـجز
لما الوطن يلبس ملابس خليعـة
لما الحيل تـفـشل ف إقـناعه
يصبح قرار الإنسحاب واجب
يصبح ثباتك ف الميدان هذيان
الحلم يصبح مادة للسخرية
وإيه الفايدة م الأحلام
من غير ما تـتحقـق
وإيه الفايدة م الأوطان
من غير ما تـتصدق
ساعات بخاف على مصر
وساعات مابخـفش
أقول الصمت أفضل
أدفن قصاقيص الورق
وأطفى نور الغـرفة
وأحاول أنام
أبيع الحلم مجاناً
وبدون مقابل
ساعات بخاف على مصر
وساعات مابخـفش
وساعات تبعنى ع الأخر
وساعات مابنمش
